Job 12

Impendulo kaJobe

1 Wasephendula uJobe wathi:

2 “Wo, lina yini elizibona kuyini abantu, njalo lenhlakanipho izakufa lani!

3 Kodwa lami ngilayo ingqondo njengani; kalingedluli ngalutho. Ngubani ongazaziyo izinto zonke lezi?

4 “Sengiyinto yokuhlekisa kubangane bami, lokuba ngacela kuNkulunkulu waphendula – inhlekisa sibili, ikanti ngilungile, ngimsulwa!

5 Abantu abahlezi kuhle bayakweyisa ukwehlelwa ngumnyama, bathi kuyimfanelo yalabo onyawo zabo sezitshelela.

6 Amathente ezigebengu avikelekile, lalabo abamthukuthelisayo uNkulunkulu bavikelekile – unkulunkulu wabo usezandleni zabo.

7 “Kodwa ake ubuze izinyamazana, zizakufundisa, kumbe izinyoni zemoyeni, zizakutshela;

8 kumbe khuluma lomhlaba, uzakufundisa, loba wothi izinhlanzi zolwandle zikutshele.

9 Yikuphi kwalezizinto okungaziyo na ukuthi yisandla sikaJehova esikwenzileyo lokhu?

10 Esandleni sakhe kulempilo yazo zonke izidalwa lokuphefumula kwabantu bonke.

11 Indlebe kayiwahloli yini wonke amazwi njengolimi lunambitha ukudla?

12 Angithi ukuhlakanipha kufunyanwa ebadaleni na? Angithi impilo ende iletha ukuzwisisa na?

13 “NgokukaNkulunkulu ukuhlakanipha lamandla; ukweluleka lokuzwisisa kungokwakhe.

14 Lokho akubhidlizayo kungeke kwamiswa njalo; lowo amvalelayo ngeke avulelwe.

15 Angaze awavale amanzi, kuba lokoma; angawavulela kuba lomonakalo elizweni.

16 Angawakhe amandla lokunqoba; okhohliswayo lomkhohlisi ngabakhe bonke.

17 Abeluleki uyabakhupha bahambe beyangekile enze abehluleli babe yiziphukuphuku.

18 Uyanyomula izibopho ezifindwe ngamakhosi azibophe ngelembu ekhalweni.

19 Abaphristi uyabakhupha beyangekile awagenqule amadoda abesithi asegxilile.

20 Uyazithulisa izindebe zabeluleki abathenjiweyo asuse ulwazi lwabadala.

21 Izikhulu uzihleka usulu abalamandla abathathele lawomandla.

22 Uyahlazulula izimfihlo ezenzeka emnyameni amathunzi azikileyo awalethe ekukhanyeni.

23 Wenza izizwe zikhule, abesezidiliza; uyaziqhelisa izizwe, aphinde azichithe.

24 Abakhokheli basemhlabeni ubemuka ukuhlakanipha kwabo; ubenza bantule enkangala.

25 Bayaphumputha emnyameni kungelakukhanya; ubenza badiyazele njengezidakwa.